Obxectivos 
Esta investigación ten como obxectivo xeral identificar, analizar e comprender os obstáculos derivados da fenda dixital no alumnado do campus de Ourense asociados ca conectividade, o acceso o coñecemento e a formación, o intercambio de información, a creación e publicación de contidos, a comunicación, a capacidade económica, o grado de alfabetización dixital, así coma outros posibles factores que fagan resentir na súa formación universitaria. Isto, coa finalidade de mellorar a situación do estudantado da educación superior no contorno provincial.
Como obxectivos específicos considéranse os seguintes. 
- Determinar a bagaxe de recursos de nova tecnoloxía dos que fai uso para a súa formación o alumnado do campus de Ourense.
- Identificar os dispositivos con acceso a internet cos que conta a nivel persoal o noso estudantado e coñecer as restricións que teñen para a súa adquisición.
- Establecer as dificultades que atopa o alumnado do campus de Ourense para a conectividade a internet, tanto dentro coma fóra do campus universitario, e en particular nas zoas rurais da provincia.
- Indagar sobre os obstáculos que ten o alumnado do campus de Ourense co uso de dispositivos con acceso a internet para a realización de actividades e traballos académicos.
- Tipificar as prácticas que leva a cabo o estudantado universitario ourensá empregando as TIC, na súa formación universitaria, en diferentes carreiras dos ámbitos de coñecemento ofertados no campus, así coma aquelas outras que non lle resulta viable a súa realización por mor das trabas derivadas da fenda dixital.
- Descubrir as barreiras que se lles presentan co uso da rede ós estudantes do campus, nas diferentes localidades da provincia de Ourense nas que residen, e as posibles repercusións no plano académico.
- Revelar o tipo de desigualdades que favorece a fenda dixital no alumnado do campus de Ourense.
Coñecer cales son as competencias que resultan mitigadas no estudantado universitario do noso campus por mor dos obstáculos derivados da fenda dixital.
- Propor alternativas para diminuír os efectos da fenda dixital procedentes das barreiras que lle xere a conectividade a internet o alumnado do campus de Ourense.
- Propor melloras para a conectividade da rede de internet, en particular no contorno do rural da provincia de Ourense a partir da identificación e da análise dos problemas concretos que presenta a realidade contextual.
- Suxerir a partir dos resultados obtidos políticas públicas para a instalación de centros comunitarios con TIC, particularmente en zonas rurais co fin de incentivar e posibilitar o uso os/as xovens, así coma para evitar a súa saída e despoboación do medio rural.
- Elaborar un repositorio electrónico de recomendacións para minorar os efectos da fenda dixital nos estudantes da educación superior ourensán residentes na provincia, co obxecto de que a súa formación lle permita acceder ó mundo laboral competindo nas mellores condicións.
- Crear un mapa dixital cos puntos de conectividade gratuíta a internet existentes en Ourense e provincia dos que se poidan beneficiar principalmente os universitarios residentes na mesma.